TERA ZARRAH MAHE KAAMIL HAY YAA GHAUS
Tera zarrah mahe kaamil hay Yaa Ghaus,
Tera qatrah yam-e- saail hay Yaa Ghaus.
Koi saalik hay ya waasil hay Yaa Ghaus,
Woh kuch bhi ho tera saail hay Yaa Ghaus.
Qad-e-be saaya zille kibriyaa hay,
Tu us be saaya zil ka zil hay Yaa Ghaus.
Teri jaageer mein hay sharq taa gharb,
Qalamro mein Haram taa hil hay Yaa Ghaus.
Dil ishq-o-rukh husn aaina hain,
Aur in dono mein tera zil hay Yaa Ghaus.
Teri sham’a dil aara ki tab-o-taab,
Gul-o-bulbul ki aab-o-gul hay Yaa Ghaus.
Tera majnoon tera sehra tera najd,
Teri laila tera mohmal hay Yaa Ghaus.
Yeh teri champayi rangat Husaini,
Hasan key chaand subh-e-dil hay Yaa Ghaus.
Gulistaan zaar teri pankhari hay,
kali sau khuld ka haasil hay Yaa Ghaus.
Ugaal us ka udhaar abraar ka ho,
Jise teri ulash haasil hay Yaa Ghaus.
Ishaare mein kiya jis ney qamar chaak,
Tu us mah kaa mah-e-kaamil hay Yaa Ghaus.
Jise ‘arsh-e-dowam kehte hain aflaak,
Woh teri kursi e manzil hay Yaa Ghaus.
Tu apne waqt ka Siddiq-e-Akbar,
Ghani-o-Haidar-o-Aadil hay Yaa Ghaus.
Wali kya mursal aayein khud Huzoor aayein,
Woh teri wa’z ki mehfil hay Yaa Ghaus.
Jise maange nah paayein jaah waale,
Woh bin maange tujhe haasil hay Yaa Ghaus.
Fuyooz-e-’aalam ummi sey tujh par,
‘Iyaan maazi-o-mustaqbil hay Yaa Ghaus.
Jo qarnon sair mein ‘aarif nah paayein,
Woh teri pehli hi manzil hay Yaa Ghaus.
Malak mashghool hain us ki sanaa mein,
Jo tera zaakir-o-shaaghil hay Yaa Ghaus.
Nah kyoon ho teri manzil ‘arsh saani,
Key ‘arsh-e-Haq teri manzil hay Yaa Ghaus.
Wahin sey uble hain saaton samandar,
Jo teri neher ka saahil hay Yaa Ghaus.
Malaaik key bashar key jinn key halqe,
Teri zau maah-e-har manzil hay Yaa Ghaus.
Bukhaara-o-’Iraaq-o-Chisht-o-Ajmer,
Teri lau sham’-e-har mehfil hay Yaa Ghaus.
Jo tera naam ley zaakir hay pyaarey,
Tasawwur jo karey shaaghil hay Yaa Ghaus.
Jo sar dey kar tera sauda kharide,
Khuda dey aql woh aaqil hay Yaa Ghaus.
Kahaa tuney keh jo maango milegaa,
RAZA tujh sey tera saail hay Yaa Ghaus.