Milk-e-khaas-e-Kibriyaa ho,
Maalik-e-har maa siwaa ho.
Koi kyaa jaane key kyaa ho,
‘Aql-e-‘aalam sey waraa ho.
Kanz-e-maktoom-e-azal mein,
Dur-e-maknoon-e-Khuda ho.
Sab sey awwal sab sey aakhir,
Ibtidaa ho intihaa ho.
They waseeley sab Nabi tum,
Asl-e-maqsood-e-hudaa ho.
Paak karne ko wuzu they,
Tum Namaaz-e-jaanfizaa ho.
Sab bishaarat ki azaa(n) they,
Tum azaa(n) ka mudda’aa ho.
Sab tumhaari hi khabar they,
Tum mu-akhar mubtada ho.
Qurb-e-Haq ki manzilein they,
Tum safar ka muntahaa ho.
Qabl-e-zikr izmaar kya jab,
Rutbah saabiq aap ka ho.
Toor-e-Moosa charkh-e-‘Eesa,
Kya musaawi-e-danaa ho.
Sab jehat key daaire mein,
Shash jehat sey tum waraa ho.
Sab makaa(n) tum laa-makaa(n) mein,
Tan hain tum jaan-e-safaa ho.
Sab tumhaare dar key rastey,
Aik tum raah-e-Khuda ho.
Sab tumhaarey aagey shaaf’-e-,
Tum Huzoor-e-Kibriyaa ho.
Sab ki hay tum tak rasaai,
Baarga tak tum rasaa ho.
Woh kalas rozey ka chamkaa,
Sar jhukaao kajkulaa ho.
Woh dar-e-dawlat pey aaye,
Jholiyaa(n) phaylaao shaaho.