Tere daaman-e-karam mein jisey neend aagayi hai lyrics 

34. AY NASEEM-E-KOO-E-JAANAN

Tere daaman-e-karam meiN jisey neend aagayi hay

Jo fanaa na hogi aisi usey zindagi mili hay.

Mujhey kya padi kisi se karuN ‘arz mudda’a maiN

Meri lou to bas unhiN ke dar-e-jood se lagi hai.

Woh jahaan bhar ke daata mujhe pheyr deN ge khaali

Meri tauba ay khuda! Ye mere nafs ki badi hay.

Jo pa-e-sawaal aaye mujhe dekh kar ye bole

Isey chain se sulaao ke ye bandah-e-Nabi hay.

MaiN maruN to mere Maulaa ye malaayka se keh deN

Koi is ko mat jagaana abhi aankh lag gayi hay.

MaiN gunaahgaar huN aor bah martaboN ki khwaahish

Tu magar kareem hai khu teri bandah parwari hay.

Teri yaad thapki dey kar mujhe ab Shahaa sulaa dey

Mujhe jaagtey huwe yuN bahi deyr hogayi hay.

Ay naseem-e-koo-e-jaanaaN zara soo-e-bad naseebaaN

Chali aa khuli hay tujh pe jo hamaari bekasi hay.

Tera dil shikastah AKHTAR isi intezaar meiN hay.

Ke abhi naweed-e-waslat tere dar se aa rahi hay.